HO AN’NY OLONA REHETRA NY FAMONJENA
ASAN’NY APOSTOLY 13:44-48
Ny famonjena hatrany amin’ny faran’ny tany
1-Mandrindra ny asa fitoriana ny Tompo
Manambara ny fandrindrana ny fitoriana ny filazantsara ny Tenin’ Andriamanitra . Atomboka amin’ny jiosy ny fitoriana ary tsy maintsy mipaka any amin’ny jentilisa ( Asa 13:46 Mat 10:6 Asa 1:7 Mar 16:15) .Tsy misy olona voatokana ho very mandrakizay . Fikasan’ i Jesoa ny famonjena ny olona rehetra . Miankina amin’ny fandraisan’ny olona na tsia ny Tenin’ ny Tompo ny famonjena azy . "Tsy sitrany ny hahafatesan’ny ratsy fanahy , fa mba ho velona " (Eze 18:23). Torina hatrany ny Filazantsara , fa tsy afa- miandry izay tsy mino . "Mitodika mankany amin’ny jentilisa izahay "hoy i Paoly , rehefa nanenjika azy ireo ny Jiosy .
2-Mampandroso ny Fitoriana ny fanenjehana
Manafaingana ny fihitaran’ny Filazantsara ho any amin’ny jentilisa ny fanenjehana ny Apostoly sy ny tsy finoan’ny Jiosy an’i Jesoa , ka indro mitodika any amin’ny jentilisa izahay (and 46b) . Raisina ho fitaovam-pahombiazana ny loza sy ny olana mitranga eo amin’ny asan’ny Tompo . Nanjary fifaliana sy fiadanam-po ho an’ny Apostoly ny fanenjehana nihatra taminy . Feno fifaliana sy ny Fanahy masina ny mpanara-dia an’i Jesoa . Tsy mitsahatra ny asa ho famobjena hatrany amin’ny faran’ny tany " (and 47,Isa 49:6). Manavotra izao tontolo izao ho azy manontolo amin’ny asa fitoriana i Jesoa , satria izay mino an’i Jesoa irery ihany ny hovonjena (Asa 18:31 ; Rom 19:10).